Liboslar dizayni

Liboslar dizayni taʼlim dasturi Toshkent Kimyo Xalqaro Universitetining Sanʼat maktabi tarkibida faoliyat yuritadi. Ushbu yoʻnalish bugungi kunda rivojlangan badiiy taʼlim dasturlaridan biri boʻlib, erkin ijodiy faoliyat, yengil sanoat kabi sohalar mutaxassislarini tayyorlaydi. Libos dizaynerining ixtisoslik bo‘yicha faoliyati quyidagi vazifalarni bajarishga qaratilgan:

Libos, toʻqimachilik, aksessuarlarning yangi turlarini loyihalash;

Ijodiy gʻoyalarni amalga oshirish;

Yangi gʻoyalar konsepsiyalarini ishlab chiqish;

Zamonaviy liboslarning funksional va badiiy bogʻliqligini inobatga olgan holda yaratish.                                      “Liboslar dizayni” taʼlim dasturi 4 yilga (8 semestr) moʻljallangan boʻlib, nazariy va amaliy fanlar oʻzaro ketma-ketligida olib boriladi. Taʼlim jarayoni davomida talabalar libos loyihasini yaratish, moda illustratsiyalari, gazlamalar bilan ishlash, modellashtirish, libos yaratishning texnologik jarayoni, kompyuter dasturlarida loyihalarni bajarish kabi koʻnikmalarga erishadilar.

Dasturni tamomlagach talabalar – 60210400 “Libos dizayni” ixtisosligi boʻyicha bakalavr darajasiga ega boʻladilar.

Qabul:

Ijodiy imtihon ikkita topshiriqdan iborat.

Oʻqishga kiruvchi abituriyentlar kasbiy (ijodiy) imtihonni chizma tasvir, kompozitsiya fanlaridan topshiradilar.

Chizma tasvir fanidan natyurmort ishlash. Abituriyent bunda buyumlarning plastikasini chuqur tahlil qilinishi, natyurmortni joylashtirish jarayonida atrof-muhit inobatga olinishi, predmetlar proporsiyasi, katta va kichik hajm koʻrinishlariga ahamiyat berilishi, ijodiy ishni bajarishda eʼtibor bilan nozik did asosida toʻliq tugallangan holatga yetkazishi talab qilinadi. Amaliy ishni bajarish uchun 160 daqiqa vaqt ajratiladi.

Kompozitsiya fanidan abituriyent mavzu boʻyicha topshiriqni akvarel, guash, tempra yoki akrilda ishlashni erkin tanlaydi. Kompozitsiya gʻoyasi, mazmuni, mohiyati mutaxassislikka xosligi, kompozitsiya yechimini mavzu asosida topilganligi, badiiy va gʻoyaviy ifodada chizma tasvir va ranglar vositasidan foydalanish darajasi, shakl va obrazlar plastik yechimi topilganligi, kompozitsion vazifasidagi asar chuqurligining perspektiv yechimi, kompozitsiya markazining ifodali topilganligi, mavzuning mazmuni va gʻoyasini ochib berishda koloritdan foydalanilishi, kompozitsiyada mazmun, gʻoya-fikrning yoritilishi va tugallanish darajasi kabi masalalarni yoritib berish talab etiladi. Kasbiy (ijodiy) imtihonda kompozitsiya fanidan berilgan mavzuni bajarish uchun 160 daqiqa vaqt ajratiladi.