2025-yildan boshlab Ichki ishlar vazirligi akademiyasida kiberxavfsizlik fakulteti ish boshlaydi, deya xabar beradi Adliya vazirligi.

2025-yilning 1-iyuliga qadar yangi fakultetda kiberhuquq, raqamli texnologiyalar, axborot xavfsizligi, aniq fanlar va sud ekspertizasi kafedralari tashkil etiladi.

2025/2026 o‘quv yilidan boshlab universitetning “Raqamli texnologiyalar sohasida jinoyatchilikka qarshi kurashish faoliyati” mutaxassisligi bo‘yicha bakalavriat yo‘nalishida to‘rt yillik o‘quv kursiga talabalarni qabul qilish boshlanadi.

Shuningdek, Huquqni muhofaza qilish organlari akademiyasida bir yillik o‘quv kursiga ega “Kiberxavfsizlikning huquqiy ta’minoti” yo‘nalishi bo‘yicha magistratura dasturlari ochiladi.