Andijon Davlat Universiteti haqida :

Zahiriddin Muhammad Bobur nomidagi Andijon davlat universiteti o‘z tarixini 1931 yildan boshlaydi. Avval Farg‘ona pedagogika insituti filiali, 1939 yilda o‘qituvchilar instituti, so‘ngra 1953 yildan Andijon davlat pedagogika instituti bo‘lib, Vatanimiz mustaqillikni qo‘lga kiritgach, 1992 yil 28 fevralda O‘zbekiston Respublikasi Prezidentining farmoni bilan Andijon davlat pedagogika instituti Andijon davlat universitetiga aylantirilgan. Bugungi kunda universitetda Filologiya, Tabiiy fanlar, Tarix, Ijtimoiy iqtisodiyot, Pedagogika, Fizika-matematika, Xorijiy tillar, Jismoniy madaniyat, San'atshunoslik, Axborot texnologiyalari, Maktabgacha ta'lim kabi 11 ta fakultet, shuningdek, 37 ta kafedra faoliyat yuritmoqda.

Universitetda 55 ta bakalavriat ta’lim yo‘nalishida kunduzgi va sirtqi ta'lim shaklida 20 ming 341 dan ortiq, 26 ta magistratura mutaxassisliklarida 527 dan ortiq talaba ta’lim olmoqda. Universitetning moddiy texnika bazasi tobora mustahkamlanib bormoqda. Hozirda 6 ta o‘quv binosidagi o‘quv auditoriyalari soni 252 tani tashkil etadi va 6570 nafardan ortiq talabaga mo‘ljallangan. O‘quv-laboratoriya xonalarining umumiy maydoni 45883 kv.metr bo‘lib, bir talabaga to‘g‘ri keladigan foydali maydon 4,5 kv.metrni tashkil etadi. 2 ta axborot-resurs markazi, 26 ta kompyuter xonasi, 954 dona kompyuter, 2000 o‘ringa mo‘ljallangan 7 ta talabalar turar joyi, 910 o‘ringa ega bo‘lgan 6 ta oshxona, 2 ta bufet, 13 ta ochiq va 3 ta yopiq sport maydonlarining barchasi talabalar uchun bo‘lib, ularning yuksak ma’naviyatli, bilimdon, jismonan baquvvat, har tomonlama yetuk kadrlar bo‘lib yetishishiga xizmat qilmoqda.

Kirish uchun talablari : 

BMB(DTM) tomonidan tashkil etiladigan davlat imtihonlarida qatnashish.

Abiturient oliy ta’lim muassasasi qabul komissiyasiga quyidagi hujjatlarni asl nusxasini ko'rsatib, ro'yxatdan o'tadi va o'zi bilan qaytarib olib ketadi:

-pasport (u yo‘q bo‘lsa, yoki 09-forma, yoki tug‘ilganlik guvohnomasi);

-umumiy o‘rta ta’lim (11-sinf negizida) yoki o‘rta maxsus, kasb-hunar ta’limi muassasasini tugatganligi haqidagi hujjat (ilovasi bilan);

-mabodo imtiyozi bo‘lsa, uni tasdiqlovchi hujjat.

Magistraturaga kerak bo'ladigan hujjatlar to'plami:

-passport ma'lumotlari kiritiladi;

-oliy ma’lumot to‘g‘risidagi hujjatning asl nusxasi (yoki diplomdan ko‘chirma — O‘zbekiston Respublikasi oliy ta’lim muassasalarini davlat granti bo‘yicha o‘qib tugatganlar uchun) hamda unga ilova ham belgilangan tartibda kiritiladi;

-Imtiyoz haqidagi hujjat (agar mavjud bo'lsa): nogironligi bo'yicha, nomli Davlat stipendiyalari va davlat mukofotlari sohibi sertifikati yoki chet tillarni bilish darajasi bo'yicha belgilangan sertifikatlar.

Universitet grantlari :

Universitetda grantlar mavjud kirish imtihonlarida yuqori ball olgan iqtirodli talabalarga yo'nalishlar kesimida davlat grantlari ajratiladi. Bu grantlar faqat bir o'quv yili uchun beriladi va kontrakt asosida qabul qilingan talabalar kiyingi o'quv yillarida grant o'qish imkoniyati bor.

Universitet stipendiyasi :

Davlat granti asosida ta’lim olayotgan talabalar:

Birinchi kursning 1-semestrida stipendiyaning bazaviy miqdori to‘lanadi;

- Keyingi semestrdan boshlab oldingi semestr natijalariga qarab quyidagi tartibda stipendiya tayinlanadi va to‘lanadi:

- Barcha fanlardan o‘zlashtirish ko‘rsatkichi a’lo bo‘lgan talabalarga stipendiyaning bazaviy miqdori 20%ga oshirilgan holatda to‘lanadi;

- Umumiy fanlarining 30% va undan ortiq qismini qoniqarli o‘zlashtirgan, ya’ni 71 balldan kam to‘plagan talabalarga stipendiya tayinlanmaydi. To‘liq davlat ta’minotida bo‘lgan yetim bolalar va ota-ona qaramog‘idan mahrum bo‘lgan bolalar sirasiga kiruvchi hamda 1 va 2-guruh nogironligi bo‘lgan talabalar bundan mustasno;

- Davlat granti asosida ta’lim olayotgan qolgan barcha talabalarga stipendiyaning bazaviy miqdori to‘lanadi.

To‘lov kontrakt asosida ta’lim olayotgan talabalarga quyidagi tartibda stipendiya tayinlanadi va to‘lanadi:

 - Kontrakt asosida o‘qiyotganlar stipendiyali yoki stipendiyasiz shaklda o‘qishi mumkin;

 - Kontraktdagilarga o‘zlashtirish ko‘rsatkichidan qat’iy nazar stipendiyaning bazaviy miqdori to‘lanadi.

 - Stipendiya tegishli tartibda belgilangan kontrakt summasi to‘langanidan so‘ng tayinlanadi va to‘lanadi.

I va II guruh nogironligi bor talabalar uchun quyidagi tartibda stipendiya to‘lanadi:

 - I va II guruh nogironligi bor talabalar grant yoki kontraktda o‘qishidan qat’iy nazar stipendiyaning bazaviy miqdoriga nisbatan 50%ga yuqori miqdorda stipendiya tayinlanadi va to‘lanadi;

 - To‘liq davlat ta’minotida bo‘lgan yetim bolalar va ota-ona qaramog‘idan mahrum bo‘lgan bolalar sirasiga kiruvchi talabalarga stipendiyaning bazaviy miqdorida stipendiya tayinlanadi va to‘lanadi.

Universitet yotoqxonasi : 

Universitetda yotoqxona mavjud. Universitet tasarrufida hozirgi kunda 6 ta talabalar turar joyi faoliyat ko’rsatmoqda, umumiy sig’imi 3532 o’rinni tashkil etadi. Hozirda 3532 nafar talaba istiqomat qiladi.

Xalqaro hamkorlik :

Andijon davlat universiteti dunyodagi 50 dan ortiq universitetlar bilan hamkorlikni yo‘lga qo‘ygan bo‘lib, ulardan 28 tasi bilan faol hamkorlik qilish bo‘yicha shartnomalar imzolangan. Xususan, London metropoliten universiteti, Norvich universiteti (Buyuk Britaniya), Dalnevostok davlat texnika universiteti, Yaroslav davlat universiteti, Novosibirsk geodeziya davlat akademiyasi optika va optik texnologiyalar instituti (Rosiya), Seul Milliy universiteti, Vusuk universiteti (Janubiy Koreya), Toxiko universiteti, Tokio til o‘rgatish markazi, Osiyo Tinchlik universiteti (Yaponiya), Markaziy millatlar universiteti (Xitoy), Mays universiteti, Y.Guttenberg universiteti (Germaniya), Piza universiteti (Italiya), Afina sotsiologik ilmiy o‘quv markazi (Gretsiya), Gent universiteti (Belgiya), Gorlovka chet tillar instituti (Ukraina), MARA texnologiya universiteti (Malayziya), Haydarobod ilmiy va boshqaruv instituti (Hindiston), Almaota universiteti (Qozoqiston) va boshqalar bilan hamkorlik yo‘lga qo‘yilgan. Kelgusida Norvegiyaning Oslo universiteti, AQShning Kaliforniya universiteti, Ispaniyaning Valensiya universiteti, Rossiyaning Perm universiteti, Fransiyaning Tuluza universiteti, Latviyaning Riga universiteti hamda Bruneya Sultonligining Bruneya texnologiya universitetlari bilan o‘quv, ilmiy va amaliy hamkorlik olib borish loyihalar rejasi ishlab chiqilmoqda.