Universitet haqida :

O‘zbekiston Respublikasi Prezidentining 1992-yil 28-fevralda “Yangi oliy o‘quv yurtlarini tashkil etish to‘g‘risida”gi Farmoniga asosan, O‘zbekiston Respublikasi Vazirlar Mahkamasining 1992-yil 11-martdagi 125-son qarori va O‘zbekiston Respublikasi Sog‘liqni saqlash vazirining 1992-yil 20-martdagi 171-sonli buyrug‘iga asosan Birinchi Toshkent Davlat tibbiyot institutining Urganch filiali tashkil etilgan. 1992-yil 2-sentabrda Birinchi Toshkent Davlat tibbiyot instituti Urganch filiali ochildi.

O‘zbekiston Respublikasi Prezidentining 1995-yil 31-maydagi Farmoni va Respublika Vazirlar Mahkamasining 1995-yil 3-iyundagi qaroriga asosan filial Urganch davlat universiteti tarkibiga qo‘shildi. UrDUda Tibbiyot markazi tashkil qilindi. 

Respublika Hukumatining 1998-yil 3-iyundagi 239-sonli qaroriga asosan UrDUning Tibbiyot markazi qaytadan mustaqil o‘quv markaziga aylantirildi. Ya’ni, Birinchi Toshkent Davlat tibbiyot instituti Urganch filiali tashkil qilindi.

O‘zbekiston Respublikasi Prezidentining 2005-yil 19-iyuldagi “Toshkent tibbiyot akademiyasini tashkil qilish to‘g‘risida”gi PF-3629-sonli farmoniga hamda O‘zbekiston Respublikasi Vazirlar Mahkamasining 2005-yil 29-iyuldagi 178-sonli qaroriga asosan yuqori malakali tibbiy kadrlarni tayyorlashni tashkil etishni takomillashtirish va uning sifatini oshirish maqsadida tugatilgan birinchi va ikkinchi Toshkent Davlat tibbiyot institutlari negizida Toshkent tibbiyot akademiyasi tashkil etildi. Birinchi Toshkent Davlat tibbiyot instituti Urganch filiali Toshkent tibbiyot akademiyasi Urganch filiali deb yuritila boshlandi. 

O'quv faoliyati : 

Toshkent tibbiyot akademiyasi Urganch filialida 5 ta fakultet tashkil qilingan bo’lib: 

Davolash fakultetida: Davolash ishi yo`nalishi (60910200), 

Pediatriya fakultetida: Pediatriya ishi (60910300), Kasbiy ta'lim (davolash ishi) (5111000) yo‘nalishi, Oliy hamshiralik ishi (60911200), Xalq tabobati ishi (60911100), 

Stomatologiya fakultetida: Stomatologiya ishi yo‘nalishi (60910100), Farmatsiya (turlari bo‘yicha) (60910700), Tibbiy profilaktika, jamoat sog‘lig‘ini saqlashni boshqarish va xorijiy talabalar fakultetida: Tibbiy profilaktika ishi (60910400), Barcha yo‘nalishlardagi xorijiy talabalar, Qo‘shma dastur fakultetida: Kazan federal universitetining Tibbiy biologiya ishi (30.05.01), Privoljsk tadqiqot tibbiyot universitetining Davolash ishi (31.05.01), Farmatsiya (33.05.01), Stomatologiya ishi (31.05.03) yo’nalishlari bo’yicha o`quv faoliyati yo’lga qo’yilgan.

Qabul talablari :

Abituriyentlar masofadan ro‘yhatdan o‘tish uchun arizalar O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligi rasmiy veb sahifasi (my.uzbmb.uz) va Davlat xizmatlari portal orqali qabul qilinadi. Va Bilim va malakalarni baholash agentligi tomonidan tashkil etiladigan test imtihonlarida yo'nalishlariga mos test sinovlarida qatnashib o'tish ballarini olish talab etiladi.

Universitet grantlari :

Universitetda grantlar mavjud kirish imtihonlarida yuqori ball olgan iqtirodli talabalarga yo'nalishlar kesimida davlat grantlari ajratiladi. Bu grantlar faqat bir o'quv yili uchun beriladi va kontrakt asosida qabul qilingan talabalar kiyingi o'quv yillarida grant asosida o'qish imkoniyati bor.

Universitet stipendiyasi :

Davlat granti asosida ta’lim olayotgan talabalar:

Birinchi kursning 1-semestrida stipendiyaning bazaviy miqdori to‘lanadi;

- Keyingi semestrdan boshlab oldingi semestr natijalariga qarab quyidagi tartibda stipendiya tayinlanadi va to‘lanadi:

- Barcha fanlardan o‘zlashtirish ko‘rsatkichi a’lo bo‘lgan talabalarga stipendiyaning bazaviy miqdori 20%ga oshirilgan holatda to‘lanadi;

- Umumiy fanlarining 30% va undan ortiq qismini qoniqarli o‘zlashtirgan, ya’ni 71 balldan kam to‘plagan talabalarga stipendiya tayinlanmaydi. To‘liq davlat ta’minotida bo‘lgan yetim bolalar va ota-ona qaramog‘idan mahrum bo‘lgan bolalar sirasiga kiruvchi hamda 1 va 2-guruh nogironligi bo‘lgan talabalar bundan mustasno;

- Davlat granti asosida ta’lim olayotgan qolgan barcha talabalarga stipendiyaning bazaviy miqdori to‘lanadi.

To‘lov kontrakt asosida ta’lim olayotgan talabalarga quyidagi tartibda stipendiya tayinlanadi va to‘lanadi:

 - Kontrakt asosida o‘qiyotganlar stipendiyali yoki stipendiyasiz shaklda o‘qishi mumkin;

 - Kontraktdagilarga o‘zlashtirish ko‘rsatkichidan qat’iy nazar stipendiyaning bazaviy miqdori to‘lanadi.

 - Stipendiya tegishli tartibda belgilangan kontrakt summasi to‘langanidan so‘ng tayinlanadi va to‘lanadi.

I va II guruh nogironligi bor talabalar uchun quyidagi tartibda stipendiya to‘lanadi:

 - I va II guruh nogironligi bor talabalar grant yoki kontraktda o‘qishidan qat’iy nazar stipendiyaning bazaviy miqdoriga nisbatan 50%ga yuqori miqdorda stipendiya tayinlanadi va to‘lanadi;

 - To‘liq davlat ta’minotida bo‘lgan yetim bolalar va ota-ona qaramog‘idan mahrum bo‘lgan bolalar sirasiga kiruvchi talabalarga stipendiyaning bazaviy miqdorida stipendiya tayinlanadi va to‘lanadi.

Universitet yotoqxonasi : Universitetda talabalar yotoqxonalari mavjud.

2023/2024-o‘quv yilidan boshlab 1-bosqich talabalarini sinov tariqasida yotoqxonaga joylashish YAIDXP yoki my.gov.uz portaliga ariza berish orqali amalga oshirildi. Yuqori bosqich talabalari esa an’anviy tarzda filial komissiyasi tomonidan ijtimoiy mezonlarga mos kelganlar arizalar saralab olindi. Filial yotoqxonasiga joylashgan I, II-guruh nogironlari, boquvchisini yo‘qotgan, chin yetim kabi mezonlarga to‘g‘ri kelgan 13 nafar talabalarga 100% va 50% gacha ttj pullari chegirilib berildi.

Talabalarning ijara uylarida joylashtirilganlik holati.

Toshkent tibbiyot akademiyasi Urganch filialida 1200 nafardan ortiq O‘zbekistonlik talabalar, 1065 nafar xorijlik talabalar ijara xonadonlari va hostellarda istiqomat qilishadi. Shundan 212 dan ortiq ijara shartnoma tuzgan 957 nafar talabalarga BHM ning 50% dan oshmagan miqdordagi ijara pullari qoplab berildi. Jumladan uzoq masofadan kelgan birinchi bosqich talabalarning sentabr va oktabr oyi ijara pullari hech qanday hujjat so‘ralmasdan BHM 50% miqdorida qoplab berildi. 

Xalqaro aloqalar va hamkorliklar :

Toshkent tibbiyot akademiyasi Urganch filialining xalqaro hamkorlik bo‘limi 2019 yilda tashkil yetilgan. Hozirgi kunda TTА Urganch filialida dunyoning 13 ta davlatlaridan 50 ga yaqin universitetlari, ilmiy-tadqiqot markazlari, xalqaro gospitallari bilan hamkorlik aloqalari yo‘lga qo‘yilgan. Oliy taʼlim sohasida dunyo universitetlari reytinglarida eng nufuzli o‘rinlarda bo‘lgan universitetlar bilan ham hamkorlik aloqalari o‘rnatilgan. Jumladan, Rossiya Federatsiyasining Qozon federal universiteti, Privoljsk tadqiqot tibbiyot universiteti, Pyatigorsk tibbiyot va farmatsevtika instituti, I.I.Mechnikov nomidagi Shimoliy-Gʼarbiy Davlat tibbiyot universiteti, Turkiya Respublikasining Istanbul universiteti, G.N. Gabrichevskiy nomidagi ilmiy tadqiqot instituti, Istanbul Universiteti, Istanbul Medipol universiteti, Аnkara Medipol universiteti, Istanbul Аydin universiteti, Istanbul Yeni Yuzyil universiteti, Izmir EGE Universitet va Istanbul Medikabil klinikalari shular jumlasidandir.